Psa 22 | HUI | STEP | I̱naga Ngode Datagaliwabe-o I̱naga Ngode Datagaliwabe-o í̠na i̱ aginaga wahalu piribe. I̱ biamogoore bibelonaga dugu bialu bi larugolabi hale nahole í̠ kaundia uyuraore haruago irane aginagabe.

a 22.1Iba 10.1, Md 27.46, Mg 15.34

b 22.2Iba 42.3, 88.1

c 22.4Iba 78.53, 107.6

d 22.6Yob 25.6, Iba 31.11, Ais 41.14, 49.7

e 22.7Ais 53.3, Md 27.39, Mg 15.29, Lg 23.35

f 22.8Md 27.43

g 22.9Iba 71.5-6

h 22.10Ais 46.3, 49.1

i 22.112 Kin 14.26, Iba 72.12, Ais 63.5

j 22.14Iba 73.26, Dan 5.6

k 22.15Iba 38.10

l 22.18Md 27.35, Mg 15.24, Lg 23.34, Yo 19.24

m 22.19Iba 22.11, 70.5

n 22.21Iba 34.4, 118.5

o 22.22Iba 40.10, Hi 2.12

p 22.24Iba 31.22, 69.17, 69.33, Hi 5.7

q 22.25Iba 35.18, 40.9-10, 61.8

r 22.26Iba 40.16, 69.32

s 22.27Iba 2.8, 82.8, 86.9

t 22.28Iba 47.7-8, Seg 14.9

u 22.29Iba 89.48, Ais 10.16

v 22.30Iba 102.18, 102.28

w 22.31Iba 71.18, 78.6

Psalms 22

Tandaga howa dugu binigobi ka̱i̱ lalu iba gana lenegobi ogo

1 I̱naga Ngode Datagaliwabe-o ^a
I̱naga Ngode Datagaliwabe-o
í̠na i̱ aginaga wahalu piribe.
I̱ biamogoore bibelonaga dugu bialu bi larugolabi
hale nahole í̠ kaundia uyuraore haruago irane aginagabe.
2 I̱naga Ngode Datagaliwabe-o i̱na horombe olalu kogo ^b
í̠na ladai nabi ke.
Mbiragabi nde olaabo halu kogoyu
í̠na i̱naga genda mo wanahe haabo kegoni.

3 Anigoyu í̠ Ngode Datagaliwabe Kini Loma Bia Hene howa haru kegoni.
Í̠ Kini kegola Isaraele wali agalime í̠naga mini mo yaraga haga.
4 Inanaga mamali heneyarume í̠ni hanaho haga biniya. ^c
Tigua í̠ ani hanaho hemiria í̠na ti pele migi biniya.
5 Tini kooreni howa í̠ olaga biyagome
tinaga waitigirunaga giha howa yo pialu pugu biniya.
Tigua í̠ni hanaho haga biniyangi
ti heagoria buru pale mbira nawi heneya.

6 Áyu wali agali bu karu bibahendeme ^d
i̱ore handabe manga halu kerekere lalu ka.
Tigua ani lalu kagome i̱ agali abale haruligobi ndo
áyu ngoe dindini pialu ngaligobi ko.
7 I̱ handaya haga biraru bibahendeme i̱ mege bialu ^e
tinaga ngui yogo bialu i̱hondo hége doma bigi biaga ka.
8 Anidagua bigi bialu howa tigua i̱hondo lalu, ^f
Í̠ Anduane Homogoni hanaho hegodago
ibugua í̠ genda yu keruni yamogo nabiradago aginagabe, laga.
Anduane Homogo ibugua í̠ kalo manda bidayagua
í̠ biamogo nabiradago aginagabe, laga.

9 I̱ pigane i̱ ai̱yahanda taba hanayangi howa ^g
í̠naga gi habeni halu anda harugo kogoni.
10 I̱ pigane hono wiyangi í̠naga gi habeni honope henego ^h
i̱naga Ngode Datagaliwabe í̠ni hanaho halu dege anda harugo áyu o kogoni ndobe.
11 Ai gendabi tara tara i̱ kogoria hapara kago ⁱ
i̱ biamogo bulene mbirali nahego í̠ dege ke lo kogoni.

12 Waitigi dewa bulumaga gabua agali hayaga alerume
ho mabu bupe kagola i̱ dombeneha ko.
Bulumaga wangabe gabua hongohe hiriribiore
Basana dindini bu heane hendene
ogobioreme i̱ ho mabu bupe kane ko.
13 Laiono gabuame agali bo tidu bagabu nole
ne ha̱la howa ngororo lagadagua
tigua i̱ bo nole ogonidagua bialu ka.

14 I̱naga hongo holene ereba haya. ^j
Iba dindini odo paya bini pu ereba hagadagua
i̱naga hongo bibahende ereba hai halu pirilipe haya.
I̱naga kuni damenego bibahende hibi habo lai halu
i̱naga gubalini nira nama anda piarua.
15 I̱naga kembobe yobi abalu ale halu ^k
i̱naga hégene dugu tagi halu ne hambuni dugu bandalape ka.
Anduane-o ani bidago i̱ durumbu o ngagoha homo tongolo muliya ngeledegoni.

16 Agali ko biagaru biango dudu tidiyu haradagua
tidiyu howa i̱ ho mabu bupe ka.
Tinaga ne tandagabigome i̱naga gi geru hayama iri dali bialu
tinaga neme i̱ haya bolomogo bida.
17 Tigua i̱naga kuniru panaga karia hondowa
i̱ yo handalu bame kuni hanguore o kagonida lowa handayaho ka.
18 Tigua i̱naga aga ti mo tale bialu ^l
aga luni mbira daliga biagane wiwago
ti ái ibu harabe hondole tadu bira.

19 Anduane Homogo-o í̠na i̱ hangu helo wanahabe. ^m
I̱ biamogo bulene í̠ dege kegonigo
i̱ biamogo bule abale íbu.
20 I̱naga waitigi karume ayu tibume i̱ ma puguligo pele ngibe.
Biango ale o bu karume i̱ bo homa boligo
í̠na i̱ abale pele ngi.
21 Laiono o bu karume i̱ bo nabeheore halu ⁿ
bulumaga wangabe gabua o bu karumebi i̱ bayagua
i̱ yo pialu pobe naheore kogonigo i̱ gini mia.

22 Í̠na gi mialu i̱ biamogo ogodagua biya lalu ^o
i̱na i̱naga wali agali karu hale helo loyogo loliya.
Ti mo ngoai ho bedagoria howa
i̱na í̠naga mini yaraga holebero.
23 I̱na ogodagua lolebero.
Anduane Homogonaga biabe biahaga kamirume
ibunaga mini yaraga hadaba.
Yagabanaga waneigini kamirume
Anduane Homogohondo ka̱i̱ ladaba.
Isaraele hameigini kamirume
Anduane Homogo ibu mitangi bialu lotu ladaba.
24 Ibugua yagibano karu biamogo bulene ha do waha ^p
tigua tandaga nalu karu hondowa nahende tingiha nabiaga kagoni.
Ani nabi howa tinime biamogo bia lalu olaragola
ibugua hale halu biamogo biaga ka, lolebero.

25 Bibahendeore ngoai ho kagoria í̠na birirunaga lalu ^q
i̱na í̠naga mini yaraga holebero.
Í̠hondo turu halu mbirale bo ngulebero lalu lo wirugo
wali agali í̠hondo gihe biru ngaru bibahendenaga deni howa ngulebero.
26 Yagibano damene íbu ngoai ho bedaru ^r
bibahendeme ti noabiradagua nendebu nolebira.
Anduane Homogo mitangi bule íbu ngoai ho bedaru bibahendeme
ibunaga mini yaraga holebira.
Wali agali uruniore bayale hangu hama puabo helo
aniore bilo laro.

27 Wali agali hameigini tara tara paluyu pedaru ^s
bibahendeme Anduane Homogo ka manda bialu
ibu karia ibalu ibu mitangi bialu lotu lai holebira.
28 Anduane Homogo ibu kini howa ^t
hameigini tara tara paluyu pedaru bibahende
ibugua handame ho kagoni.

29 Wali agali minehe dindini holene mo tene ho karu bibahende ibalu ^u
Anduane Homogonaga geha bulu paliai holebira.
Homalu dindi tago bulebirago manda buwa
bibahendeme ani biai holebira.
30 Mani dabane hama porarume Anduane Homogonaga biabe bia holebira. ^v
Tigua Anduane Homogo lalu maha anda ho aribia hene karu lamulebira.
31 Maha taba honolebiraru tibi lamialu, ^w
Anduane Homogohanda ibunaga wali agali pele miya, lalu lamulebira.